Ísafirði, 27. júní 2007 - Fréttatilkynning

    Aðalmót Sjóstangaveiðifélags Ísfirðinga 6. júlí og 7. júlí 2007

    Aðalmót Sjóstangaveiðifélags Ísfirðinga verður haldið föstudaginn 6. júlí og laugardaginn 7. júlí og er mótið hið fimmta í röð átta móta sem haldin eru víðs vegar á landinu og er liður í Íslandsmeistaramótinu í sjóstangaveiði.

    Auk verðlauna fyrir sigur í sveita- og einstaklingskeppni verða veitt verðlaun fyrir stærstu fiska einstakra tegunda, fyrir stærsta fisk mótsins, til aflahæsta heimamannsins, fyrir flestar veiddar tegundir, hæstu meðalþyngd og til þriggja fengsælustu skipstjórana.
    Búast má við að veiða þorsk, ufsa, ýsu, karfa, steinbít, sandkola, lúðu, lýsu og marhnút svo nokkrar tegundir fiska séu nefndar.
    Búast má við að sjóstangaveiðifólk frá öllum landshlutum fjölmenni í mótið sérstaklega í ljósi stóru lúðanna sem veiðst hafa hér fyrir vestan á undanförnum vikum.
    Róið verður frá Bolungarvík og látið úr höfn kl. 6.00 báða dagana. Fyrri daginn er veitt til kl. 14.00 en til kl. 13.00 seinni daginn. Mótssetning verður fimmtudaginn 5. júlí kl. 20.30 í veitingarhúsinu Vagnsson í Bolungarvík.
    Þátttökugjald er 15.000 kr. og er innifalið veislumáltíð og miði á dansleik.

    Skráning er hjá Þóri Sveinssyni í síma 456 3298 eða 896 3157 og Sigríði Jóhannsdóttur í síma 897 6782.
Stjórn Sjóís.